Au die Saison mached mier üs widr uf de Wäg.
All fu üs freued üs uf die schöne Täg.
S gad abr los früehner as jedes ander Jahr,
As würed mr zwenig becho, isch doch wahr.
Bevor s 2022i nur scho ume isch,
Gads für üs scho uf Brig, det hauemer ufe Tisch.
Früeh am morge schminke und ab ufe Car,
chum usgstige im Vallis fühlt sich de Foosi au scho we de Star.
Kunststück wenn as König underwegs duesch sii,
Bodyguards und Rösslispiel heder sicher au nu debii.
Chum isch Jänner gads de aber au widr ab,
s isch üse Bogäspeuzerball, änes wird sicher glatt.
Ob die Chline oder au die Grosse,
mid em Motto Galaxie dued s ganze Dorf astosse.
Am nami wird sich a de Hüpfburg fum Chinderball troffe
und am Abig mid Rauch, Sound und em nüe Gwändli igloffe.
De Ball, toll ischer gsi, d Lüüt hend ne glaub möge gnüsse,
gnueg Bier hed glaub bi jedem chönne de Hals ab flüsse.
Nach em Ball zum ufrume bliibed al Bogäspeuzer nu hie,
am Sunntig alls suber gsii, so schnell wie nu nie.
D Saison fahd grad so ah und de Ball hemmer scho verbii,
drum chnünled mr all bi de Uftritt so richtig drii.
So heds vor Lauerz tönt nid fu mängem fü üsere Truppe,
das wird sich den au nu as wahr entpuppe.
We scho schier as Bogäspeuzertradition bekannt,
so wird de Uftritt nach em Ball nid als best fu de Saison benannt.
Am Nami im Dorf und de Ballstress verbii,
so wird üse 00:30 Uftritt wohl nid de besti sii.
Schön ischs gsii, danke hemmer döffe zu üch gu spiele gah,
ohni wiiteri Wort lani de Lauerzuftritt so la stah.
E Wuche druf hemmer de abr zeigt, was mr chönd.
z Steine ablifere und bewiise, warum mier UF de bühni stönd.
Das de Verein im Dorf au brilliert,
wird sogar üses Guggemammi widr reaktiviert.
Nach ere rundi dur d aula Quätschä,
gads de au los mid Tön schön usebrätsche.
Mier hoffed de eint oder ander hed üse Uftritt berüert,
alles hemmer gä, so heds aml au eine ufe Dorfplatz grüert.
Im Sattel simmer gsi e Wuche denaa,
bim Guggespieli dobe hed müesse d Elite draa.
De Tino hed gwunne, eifach siigs gsii,
drum simmer am 9i uf de Bühni debii.
De Uftritt isch gsi eine fu de beste,
so hend die einte na ihri Gränze welle teste.
Üses Motto hed ne glaub nümm so gfalle,
"We are the champions" isch nämmli ghalled dur d Halle.
Mit Fischerhüet und baggis mondiert,
Hemmär nämmli am abigs Spieli brilliert.
Is luzernische hemmer die Fasnacht au nu möge ga,
mid interessierte simmer wäg dem z Hohnri dra.
Organisiert as Istand fu üsem zuekünftige Touri worde,
und as Alass für potenziell interessierti beworbe.
Schlächts weissi fu Hohnri we nüd z brichte,
uf s Fleisch i de Verpflägig müesst mr abr nid verzichte.
Chum e Stund am Fäscht simmer gsi,
So lauft die halb Gugge i Barwage drii.
En sone Wage isch doch perfekt für so en Bande,
Gugge gad usä und er isch uf me Wageheber weniger gstande.
Gspielt hemmer sicher au nid z früeh,
totzdem gänd sich alli äxtra müeh.
Ob Pompeii riisse oder bim Gölle brilliere,
au tömmer de Alls was bruchsch au nü interpretiere.
Die ganz Fasi i eim Bricht zämä fasse wär chli gar lang,
drum machemer hie sone Kliffhang.
We mier d Haupttäg überstande hend,
chönder läse im Teil 2 wenner wend.
Uf Insta teilt wirder sobald ne eine tued zämä bouä,
drum tue üs doch uf @bogaespeuzer followä.
Bis zum nächste teil, e schöne Gruess
Üchi Madamme Öpfelmuess
Comments